ساوالان
اوجا ايلهاميم او قوشلار کيمي کي
ياز وعده سينده
قووزانير ماوي گؤيه تا اوجا باش بير داغا قونسون
کؤرپه قارتال کيمي دير .
گاه چکيلير گؤزدن ايتينجک
اگله‌‌نير گاه ساوالان عشقينه-آغدان-آغا قونسون
هر اوجا داغ کي گؤرورسن باشي قارلا آغاراندي
اورا بيل کي ساوالاندي
آما يوخ!
هر اوجا داغ سسيمي آلسادا تئز قئيته‌ره‌جکدي
سسي قئيترمک همان يئل بيله‌جکدي
آخي يئل يولچودو گئتگين او کي سؤز ساخلايا بيلمز
يئل سؤزو قاپدي قاچيردار اونو کيم هاخلايا بيلمز
يئل گئدرگيندي پيچيللار سؤزو کوللار قولاغيندا
سؤزو قوربان ائله‌ير قيرنادا قانقال آياغيندا
چئويرر سؤز چاناغيندا
جايالار داغلارا هر بير سؤزو مين سؤز تؤره‌دندي
بيلميرم سيري نه دندي
يئل گئدرگيندي يئلي ساخلاماق اولماز
يئله بئل باغلاماق اولماز
آما سن اي سؤزو سينه‌نده کؤزردن ساوالانيم
کيم گله صدقله زرتشت بئجردن ساوالانيم
ائليمين شانلي داغي باشيوه مينلرجه دولانيم
اريديب ائل غمي بير يول سني کؤکدن ده تالانسان
سئل اولوب قانلي دنيزلرکيمي دونيايه جالانسان
آدي ديللرده قالانسان
ساوالانسان ،ساوالانسان
ساوالان ائل غميني بللي دي ساخلار سينه‌سينده
سينه‌سي کؤزدو آلودور گيزيريک اينسي سي واردير نفسينده
شاعيرين غملي سسينده آل گيلان ساخلا سن اي ائل داغي غملي قفسينده
ساوالان آلسادا هر سيري سؤزو داغلارا سالماز
گؤره نامرد دوروبدور ساوالاندان سس اوجالماز
ساوالاندا تؤکولن داشلاري ديندير دانيشارلار
سالسا عاشيق نفسين کوللارا ، کوللار آليشارلار
دده قورقود سازي چالسا
دلي دومرول باش اوجالدار
بلي البته کي يولداش باشيني ،يولداش اوجالدار
سسله عاشيق سازي چالسين
سسيميز بيرده اوجالسين
اويناماق ليزگييه دؤنسون
کاس شوشم گوزگويه دؤنسون
قوي وئرک سس سسه باهم اوخوياق بير ده کوراوغلو دلي سيندن
هجرين قوچ نبيسيندن
او کي ظاليملري مظلوملارين اوستونده ازردي
او کي آسلان کيمي داغلاردا ياتيب باغدا گزردي
اوخو عاشيق اوخو
سن بيل او کي تانري تانييبسان
سؤزومه دوز جالييبسان
سوموگوم قوي سازا گلسين
بولبولوم آوازا گلسين
يازميشام ائيوازا گلسين
گوج آلاق قوي دلي لردن
باج آلاق اجنبي لردن
او کي بيلمير نبي کيمدير قويون آذر ائليني مسخره سانسين
بير عؤموردور کي فضولي ني – نسيمي ني دانيب ايندي ده دانسين
شهريار تک سن اوجالت باشيوي قوي عرشه دايانسين
قوي باخار کور تر ايچينده جوموبان اؤلسون –اوتانسين
او کي آخساقدي يوبانسين
او کي تورکون ديلين اسکيتمگه تصويره ساليبدير
او کي تورکون بالاسين ايندي ده آشغالچي سانيبدير
او توفاله بيليرم فيکريني طاغوتدان آليبدير
او رژيمدندي قاليبدير
يوخسا تورکون بالاسيندان چيخيب علامه‌ي دؤران
اونا دونيا باش اگير فلسفه‌ده
بيرجه نه ايران
قوي دئييم شهرياريمدان
نيسگيل او چرچي‌‌يه قالسين کي جواهير نه‌دي ، قانمير
فيکري آلداتمادادير خالقي، ائلين حالينه يانمير
اريمير ، اؤلمور،اوتانمير
آخي اي قاردا ، دوماندا باش اوجالدان ساوالانيم
غمي،دونياني قوجالدان ساوالانيم
ائل بيلير داغلار آرا هر اوجا داغلار باشي سن‌سن
وئر سهنده اليوي قارداشيوين سيرداشي سن سن
وئرگيلن بيليک الين بيرده دماونده اونون يولداشي سن‌سن
اوندان آيريلما آماندي
يولوموز چندي دوماندي
قوي ايگيدلر سيزه فخر ائيله‌ييبن باشين اوجالتسين
قويما قارتال دولانان يئرلره قوزغون الي چاتسين
ساوالان چنلي چاغيندا
منيم ايلهاميم اولارکن
کؤنلوم اؤز سيري سؤزون صدق‌ايله سؤيلر ساوالانه
ساوالان کؤز قالادار شاعير اولانلار سينه سينده
اوردا زرتشت گئديب تانريدان ايلهامين آلانه
اگيرم باش ساوالانه،اگيرم باش ساوالانه
No comments:
Post a Comment